धादिङ ।
नेत्रावती डबजोङ गाउँपालिकाले महिलाको खेलकुद सहभागिता, नेतृत्व विकास तथा स्वास्थ्य प्रवर्द्धनलाई प्रोत्साहन गर्ने उद्देश्यका साथ “प्रथम उपाध्यक्ष कप महिला भलिबल प्रतियोगिता” आयोजना गर्ने भएको छ।
गाउँपालिकाको वार्षिक स्वीकृत कार्यक्रमअनुसार सञ्चालन हुन लागेको उक्त प्रतियोगिता गाउँपालिकाभित्रका आमा समूह, महिला तथा विद्यार्थीहरूको सक्रिय सहभागितालाई केन्द्रमा राखेर आयोजना गर्न लागिएको हो। यस प्रतियोगिताले स्थानीय स्तरमा महिलाको खेलकुद क्षमतालाई उजागर गर्दै सामाजिक एकता र आत्मविश्वास अभिवृद्धि गर्ने अपेक्षा गरिएको छ।
प्रतियोगिताको विवरणः गाउँपालिकाद्वारा जारी सूचनाअनुसार प्रतियोगिताका लागि टिम दर्ता २०८२ पौष २४ गते बिहान ११ः०० बजेसम्म निःशुल्क रूपमा गर्न सकिनेछ। प्रतियोगिता भने पौष २५ गते शुक्रबार बिहान ७ः३० बजेदेखि सुरु हुनेछ।
खेल स्थल र सहभागिताः प्रतियोगिता नेत्रावती डबजोङ गाउँपालिकाको कार्यालय परिसरमा रहेको खेलमैदानमा सञ्चालन हुनेछ। प्रत्येक टिममा ९ जना खेलाडी, १ जना टिम व्यवस्थापक र १ जना टिम कोचसहित जम्मा ११ जनाको सहभागिता रहने व्यवस्था गरिएको छ। सबै खेलाडीले अनिवार्य रूपमा जर्सी लगाउनुपर्नेछ भने खेल सुरु हुनु अगावै कम्तीमा ३० मिनेटअघि मैदानमा उपस्थित हुनुपर्नेछ।
प्रतियोगितामा सहभागी सबै खेलाडीहरू नेत्रावती डबजोङ गाउँपालिकाभित्रका बासिन्दा हुनुपर्ने र विद्यार्थी सहभागिता भएमा गाउँपालिकाअन्तर्गतकै विद्यालयमा अध्ययनरत हुनुपर्ने नियम तोकिएको छ।
खेलाडीका लागि सुविधाः प्रतियोगिता सञ्चालनका दिन सहभागी खेलाडीहरूका लागि खाना तथा खाजाको व्यवस्था गाउँपालिकाले नै गर्ने जनाएको छ, जसले खेलाडीहरूलाई थप सहजता प्रदान गर्नेछ।
आकर्षक पुरस्कार व्यवस्था: प्रतियोगितामा उत्कृष्ट प्रदर्शन गर्ने टिमहरूलाई नगद पुरस्कार, ट्रफी, मेडल तथा प्रमाणपत्र प्रदान गरिनेछ।
🥇 प्रथम पुरस्कारः रु.३०,०००
🥈 द्वितीय पुरस्कारः रु.२०,०००
🥉 तृतीय पुरस्कारः रु.१५,०००
(पुरस्कार रकममा नियमानुसार करकट्टी गरिनेछ।)
🤝 महिला सशक्तीकरणतर्फ सकारात्मक कदम: गाउँपालिकाका उपाध्यक्ष सीतामाया चोदेनका अनुसार यो प्रतियोगिता महिलालाई खेलकुदमार्फत सशक्त बनाउने, आत्मविश्वास बढाउने र स्थानीय स्तरमै प्रतिभा पहिचान गर्ने महत्वपूर्ण अवसरका रूपमा रहनेछ जनाएको छ ।साथै, सामुदायिक सद्भाव, स्वस्थ जीवनशैली र अनुशासित खेल संस्कृतिको विकासमा यसले सकारात्मक योगदान पुर्याउने विश्वास लिइएको छ।
थप जानकारी तथा टिम दर्ताका लागि ९८५११८४९१३ मा सम्पर्क गर्न गाउँपालिकाले अनुरोध गरेको छ।