धादिङ, २४ मंसिर ।
खनियावास गाउँपालिका वडा नं २ मा लैंगिक हिंसा विरुद्धको १६ दिने अभियान अन्तर्गत एकदिने सचेतनामूलक कार्यक्रम संचालन गरिएको छ ।
गाउँपालिकाको आयोजना तथा प्रयास नेपाल धादिङको सहकार्यमा एकदिने सचेतनामूलक कार्यक्रम संचालन गरिएको हो ।
कार्यक्रममा लैंगिक हिंसाका कारण, प्रभाव र रोकथामका उपाय र सिफारिस प्रणाली बारे छलफल गरिएको लैगिक सहायक शर्मिला गुरुङले बताउनुभयो । कार्यक्रममा धादिङ र खनियावास गाउँपालिकामा महिलाहरुको अवस्था ,सवाल तथा बालविवाह अवस्था ,असर र लैंगिक हिंसाका कारण, हिंसाले पार्ने असर, तथा यसलाई रोक्न व्यक्तिहरु, महिला समूह, बाल क्लब, सामाजिक कार्यकर्ता, वडा कार्यालय, महिला तथा बालबालिका शाखा र कार्यपालिकाको भूमिका बारेमा अन्तरक्रिया गरिएको गुरुङले बताउनुभयो ।
कार्यक्रममा प्रयास नेपालका कार्यकारी निर्देशक तथा सहजकर्ता रेनुका रुपाखेती, लैंगिक सहायक शर्मिला गुरुङ र खनियावास गाउँपालिका महिला तथा बालबालिका शाखा प्रमुख सन्ध्या उपाध्यायले सहजीकरण गर्नुभएको थियो ।
त्यस्तै कार्यक्रममा सहभागीहरुले सामुदायिक प्रतिबद्धता व्यक्त गर्दै, म हिंसा गर्दिन, म हिंसा सहदिन, र हिंसा भएको देखेमा प्रतिकार गर्नेछु भनी हस्ताक्षर गरेका छन् ।