धादिङ । एड्भान्स एकेडेमीमा अध्ययनरत छात्रा स्मारिका श्रेष्ठ प्रदेशस्तरीय चित्रकला प्रतियोगितामा प्रथम स्थान हासिल गर्न सफल भएकी छन् ।
कस्मस एजुकेशनल ट्रेनिङ एण्ड रिसर्च सेन्टरद्वारा आयोजित प्रदेशस्तरीय चित्रकला प्रतियोगितामा एड्भान्स एकेडेमीमा कक्षा ५ मा अध्ययनरत छात्रा श्रेष्ठले उत्कृष्ट प्रदर्शन गर्दै प्रथम स्थान हासिल गरेकी हुन् । विभिन्न विद्यालयका विद्यार्थीहरूको सहभागिता रहेको प्रतियोगितामा आफ्नो सिर्जनात्मक क्षमता, कलात्मक प्रस्तुति र उत्कृष्ट चित्रमार्फत श्रेष्ठले निर्णायकहरूको ध्यान आकर्षित गर्न सफल भएकी विद्यालयले जनाएको छ ।
प्रतियोगितामा प्रथम स्थान हासिल गरेसँगै श्रेष्ठलाई आयोजक संस्थाले नगद पुरस्कारसहित सम्मान गरेको छ । विद्यार्थी अवस्थामै प्रदेशस्तरीय प्रतियोगितामा उत्कृष्ट नतिजा हासिल गरेपछि विद्यालय परिवार, शिक्षक तथा सहपाठीहरूमा समेत खुसी छाएको छ ।
स्मारिकाको सफलताप्रति एड्भान्स एकेडेमीका प्रिन्सिपल भीमबहादुर श्रेष्ठले बधाई तथा शुभकामना व्यक्त गरेका छन् । उनले विद्यार्थीमा रहेको प्रतिभालाई पहिचान गरी उचित अवसर र प्रोत्साहन प्रदान गर्न सके उनीहरूले विभिन्न क्षेत्रमा उत्कृष्ट उपलब्धि हासिल गर्न सक्ने बताए ।
प्रिन्सिपल श्रेष्ठले स्मारिकाले आफ्नो मेहनत, लगनशीलता र सिर्जनात्मक क्षमताका माध्यमबाट विद्यालयको नाम प्रदेशस्तरमा चिनाउन सफल भएको भन्दै उनको आगामी शैक्षिक तथा सिर्जनात्मक यात्राको सफलताको शुभकामना दिएका छन् ।
चित्रकला जस्तो सिर्जनात्मक विधामा प्रदेशस्तरमै प्रथम स्थान हासिल गर्नु स्मारिकाको व्यक्तिगत उपलब्धि मात्र नभई एड्भान्स एकेडेमी र धादिङ जिल्लाकै लागि गौरवको विषय भएको विद्यालयले जनाएको छ ।
विद्यालयले विद्यार्थीको रुचि, क्षमता र प्रतिभालाई प्रोत्साहन गर्दै अतिरिक्त क्रियाकलाप तथा विभिन्न प्रतियोगितामा सहभागी गराउँदै आएको जनाएको छ । यस्ता प्रतियोगिताले विद्यार्थीको सिर्जनात्मक क्षमता विकास गर्नुका साथै आत्मविश्वास बढाउन र आफ्नो प्रतिभा प्रस्तुत गर्ने अवसर प्रदान गर्ने विद्यालयको विश्वास छ ।
प्रदेशस्तरीय प्रतियोगितामा प्रथम बनेकी स्मारिका श्रेष्ठको उपलब्धिले अन्य विद्यार्थीलाई समेत आफ्नो प्रतिभा पहिचान गरी निरन्तर मेहनत गर्न प्रेरणा मिल्ने विद्यालयको अपेक्षा छ ।