आजदेखि पुन: मेलम्चीको पानी वितरण हुँदै


  • दिव्यदर्शन
  • आइतबार, बैशाख ११ २०७९
  • पढ्न लाग्ने समय < 1 मिनेट

काठमाडौं,वैशाख ११ । वितरण बन्द भएको झन्डै १ वर्षपछि काठमाडौं उपत्यकावासीले पुन: मेलम्चीको खानेपानी पाउने भएका छन् । बाढीबाट क्षति भएको आयोजनाको मर्मतसम्भार सम्पन्न भएसँगै आज (आइतवार)देखि काठमाडौं उपत्यकाका अधिकांश स्थानमा मेलम्चीको खानेपानी वितरण गरिने भएको हो ।

आइतवार बिहान पौने ९ बजे खानेपानीमन्त्री उमाकान्त चौधरीले काठमाडौंको मीनभवनस्थित पानी ट्यांकीबाट उद्घाटन गरेसँगै उपत्यकावासीले मेलम्चीको पानी पुन: उपयोग गर्न पाउनेछन् । गत जेठदेखि मेलम्चीको खानेपानी वितरण रोकिएको थियो । काठमाडौं उपत्यका खानेपानी लिमिटेड (केयूकेएल)का प्रमुख कार्यकारी अधिकृत ई. मिलनकुमार शाक्यले पानी वितरणका लागि आवश्यक तयारी पूरा भएको जानकारी दिए ।

मन्त्री चौधरीले मीनभवनबाट खानेपानीको उद्घाटन गर्ने र त्यससँगै रहेको पाइपको परीक्षण पनि गरिने जानकारी दिए । उनका अनुसार मीनभवनसहित बानेश्वर, थापाथली, महाँकाल (चावहिल), अनामनगरलगायत स्थानमा पानी वितरण हुनेछ । यसैगरी कीर्तिपुर, खुमलटार, भक्तपुरको बोडे, स्वयम्भू, बालाजु, नयाँ बजार, कालीमाटी, महाराजगञ्ज लगायतका क्षेत्रमा आइतवारदेखि नै पानी वितरण शुरू गरिनेछ ।

सरकारले चैत मसान्तभित्र उपत्यकावासीलाई मेलम्चीको खानेपानी वितरण गर्ने घोषणा गरेको थियो । घोषणाको १० दिनपछि केयूकेएलले पानी वितरण गर्न लागेको हो । निर्माणको दशकौंपछि २०७७ चैत १५ गतेदेखि केयूकेएलले उपत्यकामा मेलम्चीको पानी वितरण शुरू गरेको थियो । त्यसबेला भने परीक्षणको रूपमा खानेपानी ल्याएर वितरण शुरू गरिएको थियो ।

अस्थायी संरचनाबाट काठमाडौंको सुन्दरीजलमा पानी ल्याइसकेको र शुक्रवार नै २७ किलोमिटर लामो सुरुङ भरिएकाले आइतवारदेखि पानी वितरण गर्न सकिने मेलम्ची खानेपानी विकास समितिका प्रवक्ता राजेन्द्रप्रसाद पन्तले जानकारी दिए । आयोजनाले गत सोमवारदेखि सुरुङमा पानी भर्न शुरू गरेको थियो । अहिले सुन्दरीजलमा पानी प्रशोधन भइसकेको र आइतवारदेखि पानी आउने उनको भनाइ छ ।

काठमाडौं उपत्यकामा दैनिक १७ करोड लिटर पानी वितरण हुनेछ । यो आयोजनामा रू. ३० अर्ब लगानी भइसकेको छ । यसका अतिरिक्त असार र साउनमा आएको बाढी, पहिरोका कारण ३६ करोड रुपैयाँ बराबरको क्षति भएको थियो । आर्थिक अभियानबाट

प्रतिक्रिया
ताजा अपडेट

सर्वाधिकार © 2024 दिव्यदर्शन टेलिभिजन. Powered by: Trishuli Web