नुवाकोट,वैशाख ७ । जिल्लाको लिखु गाउँपालिका वडा नम्बर ६ थान्सिङमा क्रियापुत्री आवास निर्माण हुने भएको छ ।
क्रियापुत्री आवास निर्माणका लागि स्थानीय जग्गादाता शम्भु पाठकले बुधबार शिलान्यास गरेसंगै क्रियापुत्री आवास निर्माण हुने पक्कापक्की भएको हो ।
क्रियापुत्री आवासको शिलान्यास गर्दै जग्गादाता पाठकले आफ्नो धर्म संस्कृति जगेर्नाका लागि आफूले जग्गा दान गरेको बताए । पाठकका अनुसार क्रियापुत्री भवनसंगै शौचालय समेत निर्माणका लागि आवश्यक जग्गा उपलब्ध गराइएको छ ।
पछिल्लो समय स्थानीय युवाहरूको नेतृत्वमा मरणपाटी निर्माणसंगै मन्दिर निर्माण,मरणपाटी सम्म पुग्ने बाटो निर्माण, तुलसी मठ निर्माण, चिता तथा धारोपानीको व्यवस्थापन भैसकेको छ ।
महायज्ञ सम्पन्न
सो क्षेत्रमा मन्दिर निर्माणसंगै सुरु भएको महायज्ञ सप्ताह समेत सम्पन्न भएको छ । रामेश्वरधाम राखिएको सो मरणघाट मन्दिर परिसरमा चैत २९ गतेदेखि महायज्ञ (सप्ताह) सुरु भएको थियोे ।
सप्ताहमा चर्चित वाचक जनार्दन पौडेलले वाचन गरेका थिए । श्रोतका अनुसार सो सप्ताहमा झण्डै १३ लाख रुपैयाँ संकलन समेत भएको छ ।
संकलित रकम मरणघाटमै खर्च हुने अगुवा युवा लगायत सप्ताह मुल आयोजक समितिले जनाएको छ । समापन समारोहमा सो समितिले सबैलाई एकवद्द गरी काम गर्नसकेमा समाज परिवर्तनका लागि कुनै सरकार आवश्यक नपर्ने बताए । आफुले सबैलाई एकबद्द गराई अघि बढेकाले मरणघाटका विविध संरचना तयार भएको बताइएको छ ।
